Zabbuli 2

¹ Lwaki amawanga geegugunga n’abantu ne bateganira obwereere okusala enkwe?

² Bakabaka ab’ensi bakuŋŋaanye, n’abafuzi ne bateeseza wamu ku Mukama ne ku Kristo we, nga bagamba nti,

³ “Ka tukutule enjegere zaabwe, era tweyambulemu ekikoligo kyabwe.”

⁴ Naye Katonda oyo atuula mu ggulu, abasekerera busekerezi, n’enkwe zaabwe ezitaliimu zimusesa.

⁵ N’alyoka abanenya ng’ajjudde obusungu, n’abatiisa nnyo ng’aswakidde.

⁶ N’abagamba nti, “Ddala ddala nateekawo kabaka owange ku lusozi lwange Sayuuni olutukuvu.”

⁷ Nzija kulangirira ekiragiro kya Mukama: kubanga yaŋŋamba nti, “Ggwe oli Mwana wange, olwa leero nfuuse kitaawo.

⁸ Nsaba, nange ndikuwa amawanga gonna okuba obusika bwo, era n’ensi yonna gy’ekoma okuba amatwale go.

⁹ Olibafugisa omuggo ogw’ekyuma, era olibabetenta ng’entamu y’omubumbi.”

¹⁰ Kale nno mubeere n’amagezi mmwe bakabaka; muyige okulabulwa mmwe abafuzi b’ensi.

¹¹ Muweereze Mukama nga mumutya, era musanyuke n’okukankana.

¹² Mwanirize Omwana, mumusembeze Mukama aleme okubasunguwalira n’okubazikiriza nga muli mu kkubo lyammwe; kubanga obusungu bwe bubuubuuka mangu. Kyokka bonna abaddukira gy’ali balina omukisa.

Open in the app to highlight, add notes, listen and ask Faith about this chapter.

Creative Commons Attribution-ShareAlike (CC BY-SA 4.0). Source: eBible.org.