Zaburi 3

¹ Yahewh, maadui zangu wako wangapi! Ni wengi wamekuja kinyume na mimi.

² Ni wengi wanaonisema, “Hakuna msaada wowote kutoka kwa Mungu kwa ajili yake.” Selah

³ Bali wewe, Yahweh, u ngao yangu pande zote, utukufu wangu, na uniinuaye kichwa changu.

⁴ Nampazia Yahweh sauti yangu, na yeye ananijibu kutoka katika mlima wake mtakatifu.

⁵ Nilijilaza chini na kusinzia; na niliamka, kwa kuwa Yahweh alinilinda.

⁶ Sitaogopa kusanyiko la watu ambao wamejipanga kinyume na mimi pande zote.

⁷ Inuka, Yahweh! Uniokoe, Mungu wangu! Kwa kuwa utawapiga maadui zangu wote kwenye taya zao; utayavunja meno ya waovu.

⁸ Wokovu unatoka kwa Yahweh. Baraka zako ziwe juu ya watu wako.

Open in the app to highlight, add notes, listen and ask Faith about this chapter.

Creative Commons Attribution-ShareAlike (CC BY-SA 4.0). Source: eBible.org.